Nos ta berdaderamente preokupa pa futuro di e trahadonan di kontratista riba Isla?

Na 1985 Shell a sera su portanan, pa motibu de anjanan di perdida kwantioso, falta di suministro stabil di crudo, un merkado internashonal difikultoso karakterisa pa un surplus den kapasidat di refinashon i margenan chiki. Ku entrada di PDVSA den e refineria mester a baha gastu pa por a sobrevivi. A redusi gastu substanshalmente riba tur frontera. Entre otro kontratistanan mester a entrega, konsekuentemente nan trahadonan tambe.

Entretantu a pasa alrededor di 25 anja. Den e period aki por konstata ku trahadonan di kontratista a rekupera e loke nan mester a entrega na anjanan 85 bin ariba. Kontratistanan tradishonal en kambio a mira nan base ekonomiko keda afekta sinifikativamente, hasiendo pa nan mas i mas difisil pa nan por hasi un pida negoshi desentemente i kumpli ku nan obligashonan pa ku nan trahadonan. E base ekonomiko aki a keda afekta pa menos kantidat di trabou kompara ku 1985, kompetensha di mas kontratista pa e mesun kantidat di trabou, I kompetensha kontra kontratistanan ku no ta sinti nan mes mara na cao i/of lei i reglanan di pais. De facto e situashon aki a bin ta kondusi kaba na un sitwashon kaminda yiunan di tera ta perdiendo trabou, mientras estranheronan si ta na of ta hanja trabou.

Komo si fuera ku esaki no ta sufisiente motibu di preokupashon, mester bisa ku e konteksto mundial i lokal ta hasi e sitwashon aun mas preokupante. E merkado internashonal aktual ta unu kaminda hopi refineria (18) a sera nan portanan e ultimo anjanan, debi na un sobrekapasidat di refinashon pa motibu di kapasidat nobo den e ekonomianan emergente, menos demanda pa motibu di e krisis ekonomiko mundial, margenan chiki i gastunan haltu. Ta e desarojonan aki a pone ku e propio PDVSA a hanje ta stop aktividatnan di refinashon na St Croix, mandando sentenares di trahado kas. Tur loke a keda ta aktividatnan di almasenahe ku ta duna trabou pa alrededor di 100 hende.

Lokalmente tin un situashon kaminda e refineria lo mester a sufri perdinan kwantioso a konsekuensha di e problemanan ku BOO, pa no papia mes di e kasonan di polushon den korte i falta di klaridat pa ku e invershonan nesesario pa garantisa su viabilibidat riba termino mas largu ekonomika- i ambientalmente.

Ta mas ku logiko ku den e konteksto di insertidumbre siginfikante aki, nos mester ta hasiendo juist todo lo posibel pa evita te kaminda ku esei ta possible, ku e sitwashon ku a manifesta su mes na 1985 no ripiti su mes atrobe. I den e kwadro ei nos tin di puntra nos mes ku oumento drastiko di salarionan di trahadonan di kontratista, despues ku e rekupera e loke a entraga na 1985, ku esaki ta responsabel ? Ku un oumento asinana, ku de fakto ta pone nos bek na e nivel di gastu ku ta un di e kousnan di seramentu di Shell, ta responsabel ? Ku si ku e eksigensha aki, berdaderamente nos tin futuro di e trahadonan aki na pechu ? Food for thought.